السبت، 21 يناير، 2012

عايز اروح الجيم - I want to go to GYM

قرار اننا نروح للجيم ساعات بياخد ايام وشهور وساعات بيبقى قرار لحظي و في ساعتها او تاني يوم بنروح الجيم ونبدأ بطاقة وحماس كبير جداً وبعديين ... بخ
في الموضوع انهاردا هناقش .. ازاي تاخد القرار الصح في الوقت الصح وتبدأ تروح الجيم وتبدأ تمارينك وتستمر في التمرين ومتزهقش
من اهم المشاكل اللى بتقابل المبتدئين ...
- الحماس الزائد ، وانه عايز يبقى شاب عضل ومرسوم في اسبوع او شهر بالكتير (معادلة صعبة جداً)
- الذهاب وحيداً للتمرين .. وبعد فتره يزهق من الوحده ويترك الـتمارين .. يجب عليك ايجاد الشريك المناسب لتشجيع بعضكم البعض على الـتمارين لتتولد روح المنافسة
- الكسل .. كل يوم يقول هروح بكرا .. ( النوع دا بيبقى مستني حافز او حد يشجعو عشان يبدأ)
وحاجات تانية كتير .. بس دي أبرزها
انوع الصالات الرياضية (الجيم)
1- صالة رياضية شعبية ..  واشتركها الشهري بتاع 50 جنية .. وموجود فيها كل الاجهزة والحياه تمام ... بس مفيش حد يتابعك وكابتن الصالة بيبقى عارفك شكلاً ( بيتابعك اول يومين وبعد كدا بخ) .. واللى ينفع تسألو الكباتن اللى بيلعبو معاك في الصالة اللى لما تسأل حد قليل قوي لما يبقى فاهم اللى بيقولهولك دا صح ولا غلط .. وعشان اية ( بس طبعاً مستحيل يقولك مش عارف ) وبيحاول يجتهد بدماغو ويفتي
وفي النوع دا ... لازم تعتمد عى الانترنت عشان تكتسب الخبرة الصح اللي تخليك تلعب صح من غير ما تأثر على صحتك

2- صالة رياضية متوسطة .. (ودا الانسب) ودي بيبقى اشتراكها الشهري حوالي 150 : 250 جنية .. معقولة جداً بتلاقى كابتن متابعك وبيحاول يتاعبك في نظام اكلك .. وبيتعملك CV بحالتك ووزنك وطولك وسنك .. وبيتابع معاك ازاي تلعب التمرينة دي .. وتلعب عضلة اية مع اية ومينفعش اية مع اية .. وبيعرض عليك المكملات الغذائية اللى ممكن تناسبك وانت تقبل او ترفض .. بصراحة بيبقى حد فاهم وبتستريح في الصالة الرياضية اللى زيي دي

3- صالة رياضية مميزة .. ودي زي جولدز جيم وما شابة .. هناك بيبقى الجيم بمفهوم مختلف والاشتراك هناك مبيكونش بالشهر .. بيقى اشتراك ربع سنوي ، نص سنوي ، سنوي .. وكل اشتراك وله سعره .. الاشتراك السنوي عندهم بـ 3800 جنية
بيبقى ليك كابتن متابعك .. وهو اللى بينظملك حياتك الرياضية ( بصراحة حاجة حلوة قوي)

قرر انت واختار الانسب

نصائح: أول يوم في الجيم
- لا تحمل اثقال فوق طاقتك --> متشلش تقيل ( غلط جدا) .. يعني بلاش فتونة ... في اليوم الاول هتلعب على كل الاجهزه بأوزان خفيقة ولمدة  حصتين تقريباً عشان جسمك يفوك ويتأهل انو يبدأ يرفع اثقال
- لا تنشغل بالاعبين الاخرين .. ستشعر بأن الجميع يراقبك ، وهذا أمر طبيعي لأنك اغلب تمارينك تلعبها بشكل غير صحيح ( لأنك مبتدىء) .. وان وشك غير مألوف في الصالة .. سيبك منهم وخليك متابع مع اللى بيعلمك .. ولو مش فاهم حاجة ومحدش جنبك متكسفش تسأل .. عادي يعني مش كل الكباتن مولودين بعضلات .. اكيد في يوم كانو زيك مبتدئين
- طاعة الكابتن اللى بيعلمك .. أتركة يتكلم للأخر ويقول اللى هو عايزه بعد كدا اسأل ....
- لو قدرت تلاقي شريك تلعبوا مع بعض .. ميزه حلوة جدا ، ( مميزات الشريك فى لعبة كمال الاجسام )
- العب التمارين .. براحة ( بشويش) .. وبلاش تسرع ، العضله بتستفاد اكتر لما تلعب ببطىء 
- قبل اي مجهود رياضي لا تنسى عملية الاحماء والتسخين 
- إذا عرض عليك الكابتن .. مكملات غذائية .. اسألو واعرف كل حاجه من المكملات واقرأ عنها على النت المميزات والسلبيات وبعد كدا قرر
- بلاش حد يقنعك بفكرة المنشطات بالمرة
- روح التمرين وانت اخر وجبة اكلتها من 3 ساعات
- اول يوم هترجع تاخد دوش وتستريح وتبدأ تحس بألم في جسمك كله .. معلش انت في مرحلة بتفوق جسمك الكسلان
- لا تستعجل الوقت .. فأول نتائج والاحساس بنمو العضلات في جسمك ستلاحظها بعد شهر تقريباً من التمرين ( كن صبوراً)
* لنصائح اكثر حول هذا الموضوع ( نصائح لكل لاعب كمال اجسام مبتدئ )

إن كنت تعاني من أي مشاكل صحية .. استشر طبيبك قبل التفكير في ممارسة رياضة كمال الأجسام

مشكلة زياده الوزن ... من الافضل ان تخسر الدهون الموجوده في جسمك أولا وبعد كدا تبدأ برفع الأثقال (سيضع لك الكابتن برنامج لذلك)
مشكلة نقصان الوزن ... ابدأ باللعب وحاول ان تزيد عدد الوجبات وأيضاً (سيضع لك الكابتن برنامج لذلك)

لمزيد من المعلومات يمكنك ايضاً زياره قسم المبتدئين .. بالتوفيق

0 comments :

إرسال تعليق

عربي باي